Kærunefnd húsamála komst í nýlegu áliti sínu að því að óheimilt væri að leggja húsbíl á sameiginlegu bílastæði. Þá tók hún afstöðu til rafmagnskapla sem notaðir voru til að hlaða húsbílinn og lögmæti þeirra.
Varðandi húsbílinn vísaði nefndin til þess að í húsreglum húsfélagsins var kveðið á um notkun sameiginlegra bílastæða og að fram kæmi í þeim að:
Á bílastæði hússins má alls ekki geyma óskráða eða ónýta bíla og eru bílastæði hússins ekki ætluð sem geymsla fyrir ökutæki, vagna eða annað. Bílastæði eru helguð bílum í venjulegri notkun. Óheimilt er að láta ökutæki, kerrur og annað standa út fyrir stærðarmerkingar og skaga inn á önnur stæði og gangstéttir.
Hún taldi húsreglurnar málefnalegar og eðlilegar að þessu leyti. M.a. með vísan til þessa taldi hún óheimilt að leggja húsbílinn í sameiginlegt bílastæði.
Annað atriði sem er áhugavert í niðurstöðu hennar er að hún fjallar um rafmagnkapla sem voru notaðir til að hlaða húsbílinn. Í þeim málum taldi hún blátt bann við hleðslu bílsins ekki í samræmi við fjöleignarhúsalögin en taldi rétt að setja því skorður með málefnalegum reglum, þ.e. hleðslutíma og atriði varðandi frágang að hleðslu lokinni.
Álitið má nálgast í heild hér.
